നിങ്ങള് ഇന്ത്യക്കാരനും മലയാളിയും കമലാക്ഷിയമ്മയുടെ ഭര്ത്താവും ഉല്പജാക്ഷന്റെ അച്ഛനും മാത്രമാവുമ്പോള് ഒരു വ്യക്തിയാണ്. എന്നാല് ഈ വ്യക്തിത്വം കുടികൊള്ളുന്നത് ഒരു മനുഷ്യനിലാണ്. ഇങ്ങ് കേരളത്തിലെ കാപ്പിമലയിലെ മനുഷ്യനും അങ്ങ് ഉഗാണ്ടയിലെ ടൊറോറോ താഴ്വരയിലെ മനുഷ്യനും തമ്മില് ഒരു നെറ്റ്വര്ക്കുണ്ട്. മനുഷ്യനും മനുഷ്യനും തമ്മിലുള്ള ഈ നെറ്റ്വര്ക്ക് വ്യക്തിയും വ്യക്തിയും തമ്മില് ഉണ്ടായിക്കൊള്ളണമെന്നില്ല. മനുഷ്യന് പൂര്ണ്ണവും വ്യക്തി അംശവുമായതുകൊണ്ടാണ് ഇങ്ങനെ സംഭവിക്കുന്നത്. അംശത്തില് പൂര്ണതയില്ലെന്നും എന്നാല് പൂര്ണതിയില് അംശവുമുണ്ടെന്നും ജിദ്ദു കൃഷ്ണമൂര്ത്തിയും ഓഷോയും ഒരേ സ്വരത്തില് പറഞ്ഞത് ഓര്ക്കുന്നു.
വ്യക്തിക്ക് എന്റെ ദേശം എന്റെ മതം എന്റെ ജാതി എന്റെ കുടുംബം എന്നതിലപ്പുറം പോകേണ്ടതില്ല. എന്നാല് മനുഷ്യന് തന്റെ ജൈവകുലത്തിന്റെ വ്യഥകള്ക്കും വേവലാതികള്ക്കും നേരെ കണ്ണടക്കാനാവില്ല. ദേശീയത, മതം, ജാതി, പ്രത്യശാസ്ത്രങ്ങള് തുടങ്ങിയവയെല്ലാം മനുഷ്യന്റെ നെറ്റ് വര്ക്ക് തകര്ത്ത് അവനെ വിഭജിച്ചുകൊണ്ടിരിക്കുമ്പോള് മനുഷ്യര് വ്യക്്തികള് മാത്രമായി ചുരുങ്ങിവരികയാണ് എന്നത് മറ്റൊരു വസ്തുത.
മലയാളി എന്തുകൊണ്ട് ഗാസ ഗാസ എന്നു നിലവിളിക്കുന്നു എന്ന് നിരന്തരം കേട്ടുകൊണ്ടിരിക്കുന്നതാണ് ഈ കുറിപ്പിന് കാരണം. കുരുതികള് ഗാസയിലായാലും ബാഗ്ദാദിലായാലും കാഠ്മണ്ഠുവിലായാലും മലയാളി നിലവിളിക്കും. കാരണം മലയാളി ഇപ്പോഴും അത്രയൊന്നും വ്യക്തി മാത്രമായി ചുരുങ്ങിയിട്ടില്ല, മനുഷ്യത്വത്തിന്റെ നെറ്റ്വര്ക്കില് നിന്ന് അകന്നുപോയിട്ടില്ല. കുരുതി ഇപ്പോള് ഗാസയിലായതിനാല് ഗാസ എന്നു നിലവിളിക്കുന്നു, മറ്റൊരിടത്തായാല് ആ പേരില് നിലവിളിക്കും.
അല്ലെങ്കില് തന്നെ നമ്മളെപ്പോഴാണ് മനുഷ്യത്വത്തിന്റെ ഈ നിലവിളി നിര്ത്തിയിരുന്നത്. ടിയാനന്മെന് സ്ക്വയറെന്നും സോമാലിയയെന്നും ദക്ഷിണാഫ്രിക്കയെന്നും ബാഗ്്ദാദെന്നും കൊളംബോയെന്നുമൊക്കെ പറഞ്ഞ് നമ്മള് നിലവിളിക്കുകയായിരുന്നുവല്ലോ. ഇപ്പോള് ഗാസയുടെ പേരിലുള്ള നിലവിളി കേള്ക്കുമ്പോള് ചിലരെങ്കിലും അസ്വസ്ഥത പ്രകടിപ്പിക്കുന്നത് അവരുടെ നെറ്റ്വര്ക്ക് തകരാറായിട്ടാണ് എനിക്കു തോന്നുന്നത്. ദേശീയതയോ മതമോ അങ്ങനെ എന്തോ അവരുടെ ശ്രംഖലക്കണ്ണികളെ കരണ്ടു തിന്നിട്ടുണ്ടാവണം. ഗാസക്കുവേണ്ടി മാത്രം നിലവിളിക്കുകയും അല്ലാത്തപ്പോള് തൊണ്ടയില് പൊള്ളുന്ന ചക്കക്കുരു കുടുങ്ങിപ്പോവുകയും ചെയ്യുന്നവര്ക്കും ഈ ഉപമ ബാധകമാണ്.
No comments:
Post a Comment